Les asociaciones de fiestes de Llangréu alerten de que la nueva ordenanza municipal pon en riesgu los centros sociales

Los colectivos soliciten una xunta col alcalde pa conocer el detalle de la normativa

En Llangréu, siguen les diferencies ente les asociaciones de fiestes y l’equipu de gobiernu dempués del primer Conseyu Sectorial de Fiestes. Los colectivos reclamen conocer los posibles cambeos na xestión de centros sociales, porque podríen afectar a la so viabilidá. Dende l’ayuntamientu busquen caltener un orde nestos espacios.

Los colectivos alerten d’un cambéu na normativa de 2010 de cesión de los centros sociales. Acciones como un posible cambéu d’horarios afectaría a la continuidá d’estos espacios o a la viabilidá de les fiestes, al ser una de les sos fontes principales d’ingresos.

Nel Conseyu Sectorial demandaron, amás, l’ampliación d’horarios de fin de fiestes más allá de les 04:00 o la revisión del plan d’autoprotección.

Dende l’equipu de gobiernu d’IX, espliquen que se busca caltener un orde nos centros sociales, pa que cumplan cola so finalidá de llugar d’alcuentru.

Tamién estudiarán la posibilidá d’ampliación d’horarios de les fiestes, consultando la opinión de la sociedá llangreana.