Múltiples disciplines de los 12 estranxeros que creen dende Asturies

La esposición colectiva pue visitase hasta xunu na Casa de les Artes de Güeñu

Per primer vegada una amuesa recueye obres de los artistes estranxeros residentes n'Asturies más destacaos. El comisariu de la esposición, Fermín Santos, escoyó 12 nomes. Hai gráfica, oleu, escultura o acuarela. Pue visitase hasta mediaos de xunu na Casa de les Artes y les Ciencies de Güeñu.

La escultura o la pintura escultórica de Tanadori Yamaguchi ye conocida na rexón. El xaponés, con cuasi 30 años de residencia n'Asturies, foi artista convidáu nel Belles Artes.

Tamién ye sólida la relación con Asturies de l’artista de los Estaos Xuníos, pero tamién española, Mónica Dixon, les sos xeometríes y cases fueron motivu recién d'esposición na galería Guillermina Caicoya y la pinacoteca asturiana cuenta con obra so.

La singularidá d'esta amuesa ta en ver xuntes pieces d'hasta 12 artistes estranxeros afincaos nel Principáu.

Artistes, nacionalidaes y técniques. Atopamos la cerámica de la francesa Cecile Brillet, les acuareles de la peruana Eleana Luque, xilografía y litografía del colombianu Carlos Pérez o la tinta chino de la húngara Klara Konkoly.

Tamién dalguna imaxe d'influencia asturiana, como un oleu de la francesa Eva Boilley, qu'amuesa un horru arrodiáu de fauna autóctona.