N'Asturies calcúlase qu'hai unes 1.000 persones trans y un 40% cree que la sanidá nun sabe cómo atendeles

Abel Gutiérrez lleva seis años en llista d'espera pa ser interveníu

N’Asturies calcúlase qu’hai unes 1.000 persones trans, una por cada mil habitantes. Sedríen 47.000 en toa España. Ye una estimación porque namás el 10% visibilizó la so identidá por mieu al refugu o por barreres alministratives. Ye un datu del primer estudiu sobre esti colectivu del Institutu de Salú Carlos III. Según esta mesma fonte un 40% cree que la sanidá nun sabe cómo atendeles.

Nel casu d’Abel Gutiérrez, lleva seis años en llista d’espera pa ser interveníu. Abel ye músicu de la banda gaites Villa de Xixón, y cuntónos parte de la so historia na visita recién a Nueva York, dende un llugar históricu pa la so comunidá.

Acompañamos a Abel Gutiérrez nún de los momentos más emocionantes de la so vida. Esti pequeñu parque de Manhattan, güei monumentu nacional, recuerda los disturbios qu’en 1969 desencadenaron el movimientu internacional polos derechos de la comunidá Lgtbi. Una redada nun bar desató unes revueltes históriques. Foi un 28 de xunu, güei día del arguyu en conmemoración d’aquel llevantamientu.

Mientres para encantáu en cada detalle, rellata qu’esti ye’l so segundu viaxe a Nueva York pero’l primeru siendo Abel.

Güei ye un home feliz, anque-y falten pasos importantes por dar. Dende 2019 ta en llista d’espera por una mastectomía. A la espera de la llamada de la sanidá pública, mira les semeyes que retraten a los homes y muyeres qu’abrieron el camín.

Too entamó nel Stonewall Inn del Baxu Manhattan, que décades dempués sigue siendo llugar de xunta y faru de la comunidá Lgtbi.