Centenares de persones homenaxeen a Grandes llevando un llibru al so entierru

Familiares y amigos despiden a la escritora

"!Gracias, Almudena!" ye’l glayíu que se sintió esta mañana nel cementeriu civil de Madrid onde miles de llectores, familiares y amigos despidieron a Almudena Grandes, que foi enterrada nun actu presidíu por grandes fotos de la escritora y una de les sos frases: "No hay amor sin admiración".

El presidente del Gobiernu, Pedro Sánchez; la vicepresidenta segunda, Yolanda Díaz; artistes como Joaquín Sabina, Pedro Almodóvar, Ana Belén o Miguel Ríos y escritores como Luis Landero fueron dalgunes de les munches persones qu’acompañaron al home d’Almudena Grandes, el poeta y director del Institutu Cervantes, Luis García Montero, y al restu de la so familia nel entierru.

Dende primeres hores de la mañana del fríu y soleyeru llunes que facía en Madrid, dellos centenares de persones entamaron a llegar al Cementeriu Civil llevando un llibru d’Almudena Grandes, como homenaxe a la escritora, y lleeron fragmentos coles sos noveles embaxo d’una gran bandera republicana.