Afechiscu montaxe nel Belles Artes p'acoyer una de les pieces de Plácido Arango

El Retablu de la Flaxelación ye la obra más delicada de les 29 donaes

La obra más delicada de les 29 que donó Plácido Arango al Muséu de Belles Artes d'Asturies, ta en plenu procesu d'instalación.

Ye'l Retablu de la Flaxelación del sieglu XV encargáu pola madre abadesa Leonor de Velasco. Ye una pieza única que pudo acabase dempués de 1486 o enantes de 1494. Ye dicir, nel tiempu del descubrimientu d'América.

D'esa dómina vien esta obra de cinco metros d'altu por cuasi cuatro d'anchu, ensin cuntar el guardapolvu, el bancal y la crestería.

La crestería ye l'ornamentu que, enagora, yá foi instaláu. P'asitiar el retablu nel muséu asturianu fai falta un precisu, minuciosu y complexu sistema de carpintería, que ta siendo tuteláu por dos restauradores.

Del procesu ta encargándose una empresa especializada de Madrid y en tola so trayectoria, nunca nun tuvo qu'enfrentase a una dificultá tan grande, amestada al fechu de que la pieza nun va tar apoyada nel suelu.

La instalación d'esti retablu compuestu por ocho tables acabaráse esti xueves. La donación dafechu, según pudo saber TPA Noticies, inauguraráse'l día 25 viniente.