Asiegu despierta de la so histórica visita

Dalgunos curiosos avérense güei a esfrutar del Pueblu Exemplar 2019

Pasaron malapenes 24 hores de la visita de la familia real al pueblu d’Asiegu. Nin rastru de la xente, del baturiciu, nin de la lluvia nesti pequeñu pueblu cabraliegu.

Güei la calma y el fríu tomaron les cais d’Asiegu, nes que malapenes queden rastros de la xornada d’ayeri. Namái’l ruíu de los coches ruempe’l silenciu, y onde ayeri caminaben reis, güei caminen oveyes.

Entovía güei dalgunos curiosos avérense hasta esti pequeñu pueblu pa pasiar ente les sos cases. Pa ver la so belleza nun día, eso sí, nel que‘l tiempu acompañó y dexó esfrutar de les sos privilexaes vistes, qu’ayeri nun pudo ver la familia real.

Agora vuelta a la normalidá, dempués d’una xornada histórica p’Asiegu, el pueblu pensáu, el Pueblu Exemplar d’Asturies.