Asociaciones asturianes reclamen la protección del patrimoniu industrial

Remarquen la necesidá de 'protexer y caltener los conxuntos arquitectónicos'

Un total de 28 plataformes y asociaciones ciudadanes asturianes, encabezaes pol colectivu Fábrica de Gas e Ideas, roblaron un manifiestu en defensa del Patrimoniu Industrial asturianu nel qu'encamienten a les alministraciones públiques a protexer, recuperar y rehabilitar pa nuevos usos los edificios industriales hestóricos de la comunidá autónoma.

Los representantes de delles de les asociaciones afitaron esti vienres en rueda de prensa'l peligru que cuerren munches d'estes edificaciones y remarcaron la necesidá de "protexer y caltener los conxuntos arquitectónicos", que consideren parte del patrimoniu cultural y hestóricu de los distintos conceyos asturianos.

El manifiestu presentáu afonda nel valor cultural qu'apurre al Principáu esti tipu de patrimoniu industrial, que definen como "aquel que ta dientro del encruz nel que se crucien l'arquitectura, la inxeniería, los paisaxes, la hestoria social, les empreses y la maquinaría" y que fala de l'Asturies industrial del periodu entendíu ente metá del sieglu XVIII y el postrer terciu del XX.