Asturies Selmanal aborda'l 'Desafíu eólicu'

Mediu centenar de proyectos eólicos tán en tramitación nel Suroccidente

Esta selmana entra en funcionamientu, de manera parcial, el Parque Eólicu Busecu, nos conceyos de Tinéu, Valdés y Villayón. Con él sedrán 24 los complexos eólicos funcionando n’Asturies. Pero l’escenariu nun ye’l definitivu. En tramitación hai otru mediu centenar de proyectos, y toos nel Suroccidente. Un panorama controvertíu nel qu’afondará esti sábadu’l programa Asturies Selmanal.

En plena transición enerxética, lo eólico pisa l’acelerador n’Asturies.

Ricardo Fernández, director d’Infraestructures de Capital Energy asegura que "anguaño tenemos una cartera de proyectos de, al rodiu, 30 proyectos, con una potencia d’accesu axudicáu de 1.200 megavatios".

Per parte de so, Nieves Roqueñí, viceconseyera de Mediu Ambiente, apunta a que la sustitución de centrales de carbón "tenemos que facela sí o sí, y tenemos que facel con enerxía anovable na midida de lo posible".

Un total de 24 complexos eólicos yá xeneren electricidá, pero a curtiu plazu podríen ser munchos más. Tramítense mediu centenar de proyectos, con polo menos 400 nuevos aeroxeneradores. Y toos, como los actuales, en nel Occidente.

L’alcalde de Tinéu, José Ramón Feito, solliña que "tenemos esti recursu que ye’ vientu", que debemos aprovechar. "Hai una zona amplia del conceyu onde se pue instalar y siguiremos apostando por ellos", remata Feito.

Sicasí, los conceyos debátense ente l’aceptación y el refugu, a lo qu’entienden como una escalada.

Por exemplu, César Villabrille, alcalde de Taramundi, diz sentise "daqué agredíu por esto, hai nueve solicitúes en delles fases, en Taramundi, y la instalación d’una llinia d’alta tensión pa la evacuación de los parques...".

Más dura foi Carmen Molejón, portavoz de la Plataforma Xente Ozcos-Eo, qu’apunta a una amenaza d’invasión eólica nel Occidente. "La consecuencia ye la despoblación: tán echándono", diz Molejón.

Nesti sen tamién ta Nicolás López-Jiménez, delegáu de SEO BirdLife n’Asturies. "¿Qué diría la ciudadanía, la opinión pública, si tuvieren cayendo nos parques eólicos osos y gallos monteses, que tienen la mesma categoría de protección a nivel estatal que dalgunes aves que tán cayendo nos parques eólicos, como dalgún ferre?".

Naide dulda de qu’habrá impactos. La entruga ye cuántos tien qu’asumir Asturies.

Con 23 entrevistes en 14 llugares distintos, Asturies Selmanal aborda, dafechu, el 'Desafíu Eólicu'.​