Asturies tendrá un stand propiu en Madrid Fusión

Promocionaráse la marca de calidá Alimentos del Paraísu Natural

L'universu de sabores, testures y sensaciones que ye Madrid Fusión dará cabida, per primer vegada, a un stand d'Asturies nel que se promocionará la marca de calidá Alimentos del Paraísu Natural. Ye una cuidada escoyeta de más de 20 productos desarrollaos en propuestes culinaries polos meyores cocineros de la rexón.

El cangués José Antonio Campoviejo preparará un platu col quesu Afuega'l pitu d'ingrediente estrella. Esta edición tamién sedrá vital pa la Denominación d'Orixe Sidra d'Asturies. Inxertu na espansión nacional y internacional del productu, el Conseyu Regulador aterriza en Madrid con dellos eventos, maridaxes y cates.

Cola mesma intención, la d'esparder el so mercáu, viaxen tamién los responsables del vinu de Cangas. Vinu qu'en Madrid Fusión se combinará en maridaxes con productos como'l choscu o'l chorizu.

Madrid Fusión entama mañana llunes y acaba'l próximu miércoles. Tres díes nos que la gastronomía mundial pondrá'l focu nesti eventu, unu de los más prestixosos del planeta.