Campaign for Female Education, Princesa d'Asturies de Cooperación Internacional 2021

Busca eliminar la probeza n'África subsah.ariana al traviés de la educación de les neñes

Campaign for Female Education (Camfed), una ONG fundada en 1993 p’ayudar a eliminar la probeza n’África subsah.ariana al traviés de la educación de les neñes y muyeres moces más vulnerables, algamó esti miércoles el Premiu Princesa d’Asturies de Cooperación Internacional 2021, al qu’optaben 29 candidatures de 16 nacionalidaes distintes.

Camfed (Campaña pola Educación Femenina) ye un movimientu panafricanu que sofita la educación de les neñes en más de 6.700 escueles asociaes de Zimbabwe, Zambia, Ghana, Tanzania y Malawi y que dende la so fundación ayudó a más de 5 millones de neños a dir a escuela.

El de Cooperación ye’l sestu premiu en fallase de los ocho que da añalmente la Fundación Princesa d’Asturies dempués de los daos al escritor francés Emmanuel Carrère (Lletres), a l’artista serbia Marina Abramovic (Artes); a la periodista y escritora de los Estaos Xuníos Gloria Steinem (Comunicación y Humanidaes); al economista indiu Amartya Sen (Ciencies Sociales) y a la nadadora paralímpica española Teresa Perales (Deportes).