Cinco autores lleven la so obra a les Xornaes de Lliteratures Africanes

Les IV Xornaes Internacionales de Lliteratures Africanes van facese del 26 al 28 d'esti mes

La maliense Fatoumata Sibidé, l'arxelín Lamine Benallou, l'angoleñu João Melo y los cameruneses Inongo-vi-Makomé y Marcial Dougan van participar nes IV Xornaes Internacionales de Lliteratures Africanes que se van celebrar, de forma presencial y telemática, del 26 al 28 d'esti mes.

Esta actividá ta entamada pola fundación El Pájaro Azul col financiamientu de l'Axencia Asturiana de Cooperación al Desarrollu y la collaboración de la Universidá d'Uviéu y del proyectu d'investigación I+D+i “Voces y miraes lliteraries en femenín: construyendo una sociedá europea inclusiva”.

Nesta cuarta edición la fundación da'l Premiu Lliteratures y Lletres Africanes al proyectu navarru “África Imprescindible” en reconocencia a la so llarga trayectoria apostando poles cultures africanes.

Esti simposiu, que se va desenvolver sol epígrafe “La diáspora africana”, va celebrase de manera presencial nel Aula Rector Alas del Edificiu Históricu de la Universidá d'Uviéu.