Confinaos nuna autocaravana

Afirmen que'l so estilu de vida prepáralos pa cualquier contixencia

L'estáu d'alarma dexa pasar estos díes de confinamientu nuna autocaravana y en Xixón, alcontramos un grupu de persones nesta situación. Los sos díes nesta crisis, aseguren, son mui distintos a los de los que viven nun pisu o una casa.

Carmen ye una de les poques xixoneses que pasa'l confinamientu en cuatro ruedes. Ye verdá que nun tien munchu espaciu, pero compénsalo col paisaxe que ve cada vegada que mira pela ventana de la so autocaravana. Esti ye l'estilu de vida qu'escoyó tanto pa los bonos como los malos momentos.

La rutina namás s'interrumpe cuando toca dir a la compra o a por agua a la fonte. Na mesma situación tán Vera y Manuel, unos amigos colos que quería entamar un viaxe cuando se decretó'l confinamientu.

Vera y Manuel pasen llargues temporaes na Asturies natal d'esti emigráu a Francia. Llevar la casa a cuestes, aseguren, prepárate pa tar preparáu énte cualquier continxencia que pueda surdir.

Los tres siéntense afortunaos de que-yos tocare esta situación en Xixón. N'otros puntos d'España, aseguren, nun se dexa a los autocaravanistes pasar el periodu de cuarentena nos aparcamientos habilitaos p'aparcar.