Dalgunos asturianos nun queden en casa

Sancionaes en Xixón una ventena de persones por tomar el sol y pasiar

Los axentes de l’autoridá tuvieron que trabayar esta mañana, dalguna vegada, pa garantizar que se cumplan les midíes inxertes nel real decretu qu’afita l’estáu d’alarma aprobáu pol Conseyu de Ministros.

En xeneral hubo pocu tráficu n’Asturies, persones pasiando perros y viandantes, d’unu nunu, dirixéndose de mano a cumplir con xeres de primer necesidá.

Les midíes tán orientaes a amenorgar el contaxu pela vía d’evitar el contactu humanu na midida de lo posible. Quier evitar n’especial aglomeraciones como les que, nun día como güei, domingu y, amás, soleyeru, suelen producise nes sableres.

L’incumplimientu de les midíes inxertes nel decretu que declara l’estáu d’alarma énte la crisis sanitaria producida pol COVID-19 pue trayer pa los ciudadanos dende multes de 100 euros hasta pena de tres meses de cárcel por un delitu de desobediencia y de cuatro años por atentáu a la autoridá.

Coches de la Policía Nacional equipaos con megafonía tán avisando peles cais de la capital asturiana de la necesidá de tar dientro les cases y de que namás se salga fuera nel casu de necesidá.

Nel so mensaxe, la Policía alvierte de que nun se pue tar na cai y de que namás se puen facer los trayectos permitíos pol estáu d’alarma qu’ayeri decretó’l Gobiernu central, ente ellos, los precisos pa dir comprar comida o trabayar.

La policía local de Xixón propunxo sanciones pa una ventena de persones qu’esti domingu, a pesar de les llendes afitaes pol Estáu d’Alarma qu’hai en tol país, taben tomando’l sol nes sableres de Poniente y L’Arbeyal, andando en bici per El Parque Fluvial o dando vuelter per El Paséu Begoña.