Dellos voluntarios recuperen dalgunes partes de les trincheres de la Guerra Civil n'El Mazucu

Los trabayos presentáronse coincidiendo col homenaxe que la Federación Asturiana Memoria y República entama cada añu

N’El Mazucu dellos voluntarios recuperen dalgunes partes de les trincheres de la Guerra Civil. Güei presentáronse coincidiendo col homenaxe que la Federación Asturiana Memoria y República entama nesi llugar tolos años.

En L’Altu de La Tornería, un entornu aparentemente tranquilu y paradisiacu tuvo llugar una batalla relevante, la d’El Mazucu. Y nesti mesmu llugar, el trabayu de dellos voluntarios dexó recuperar lo que fueron trincheres defensives.

La Batalla d’El Mazucu foi va 85 años, y agora los republicanos van a L’Altu de La Tornería pa conmemorar esi momentu históricu. Dientro de los actos conmemorativos hubo tiempu pa homenaxar a dellos militantes y activistes republicanos venceyaos de dalguna forma a Asturies.

Tamién hubo tiempu pa esparder el proyectu 'Cumbres en pie de Guerra', la novela gráfica que ta creando’l dibuxante asturianu Guillermo Menéndez.