Earle afirma que ye un "honor" recibir el Princesa de la Concordia

'La dama de les profundidaes' espera conocer más sobre la rexón nos próximos díes

La oceanógrafa estadounidense Sylvia Earle afirmó güei a la so llegada a Uviéu que ye un "gran honor" recibir el Premiu Princesa d'Asturies de la Concordia 2018 por defender los océanos nesti momentu de la hestoria.

En declaraciones a los periodistes a la entrada del Hotel de la Reconquista d'Uviéu, onde foi recibida pola directora de la Fundación Princesa d'Asturies, Teresa Sanjurjo, Earle amosó'l so agradecimientu por esti "inmensu honor" que-y foi concedíu.

Amás, declaró qu'espera conocer más sobro la rexón nos próximos díes y falar del mar, "el so tema favoritu".

Conocida como 'la dama de les profundidaes', Earle, de 83 años, foi galardonada con esti premiu pol so trabayu a favor del caltenimientu de los océanos, unu de los desafíos medioambientales del nuesu tiempu.

La que foi considerada "Héroe del planeta" pola revista Time en 1998 foi reconocida con esti galardón pola so dedicación de más de seis décades a la esploración y investigación de los océanos, la conocencia de los fondos marinos y el caltenimientu integral de los mares.

L'acta del xuráu tamién destacaba la toma de conciencia de la importancia de los océanos como una riqueza común.

Earle, que va recibir esti galardón el próximu vienres de manos del rei Felipe VI, ta considerada una de les grandes esploradores del sieglu XX, y llegó a dirixir el primer equipu de muyeres que vivió sol mar n'agua de les Islles Vírxenes dos selmanes.

Na so trayectoria dirixó más de 60 espediciones en tol mundu, con más de 6.500 hores d'inmersión, y collaboró nel estudiu de los daños causaos polos derrames de petróleu.

Con más de 100 espediciones feches y un récord d'inmersión sola a 1.000 metros, Earle súmase a la nómina de galardonaos col Premiu Princesa d'Asturies de la Concordia, como la Xunión Europea, Unicef, Adolfo Suárez o Stephen Hawking, ente otros.