El Belles Artes pide más seguridá

Atentaos escontra cuadros como 'Los mirasoles' de Van Gogh en museos europeos

Pa evitar que n'España suframos atentaos como'l d'Inglaterra escontra 'Los mirasoles' de Van Gogh, o l'executáu n'Alemaña escontra 'Les vares de yerba' de Monet, el Ministeriu de Cultura encamienta a los museos estatales a qu'estremen la seguridá. Píde-yos que seyan sobre manera duros cola prohibición d'introducir alimentos y bebíes nes sales, mochiles, paragües o oxetos pinchantes.

N'Asturies, la dirección del Muséu de Belles Artes, dependiente del Principáu, alvierte de que nun tien suficientes vixilantes pal tamañu de les instalaciones, nunes sales onde s'amuesen cuadros de Dalí, Picasso, Sorolla o El Greco. Nun hai arcu de seguridá nin escáner na entrada. La dirección sorraya que pidió dende siempres más medios y que volverá reclamalos a la Conseyería de Cultura.

En Xixón, la Fundación Municipal de Cultura refuga reforzar les midíes de seguridá nel Nicanor Piñole y la Casa Natal de Xovellanos. Son equipamientos que, igual que'l Belles Artes, nun tienen controles de seguridá na entrada. La Fundación considera que los ataques daos hasta'l momentu n'Europa son puntuales y considera qu'aumentar la seguridá nun los evitaría.