El Principáu remocicará El Rellán como un llugar de la Memoria Histórica

Rita Camblor: 'Ye'l momentu de zarrar mancadures que lleven munchu tiempu abiertes'

El Gobiernu del Principáu remocicará una finca d’El Rellán, nel conceyu de Grau, na que se cree que tán los restos d’unes 40 persones executaes na dictadura franquista, como un llugar pa la Memoria Histórica, según afirmó esti miércoles la conseyera de Presidencia, Rita Camblor.

Camblor, que visitó güei, cola directora xeneral d’Emigración y Memoria Democrática, Begoña Serrano, la zona onde se ta llendando’l perímetru de la fosa común d’El Rellán de la represión franquista, aseguró que "ye’l momentu de zarrar mancadures que lleven munchu tiempu abiertes".

Agradeció la collaboración y el compromisu del alcalde de Grau, José Luis Trabanco, cola Memoria Democrática y recordó que’l conceyu yá mercó, en 2018, esta finca na que, colos trabayos fechos en xunetu de 2020, pudo localizase nel primer día de trabayu los restos de polo menos tres persones y 19 casquillos de bala.