El Puertu prepárase pa la visita de los Reis

Segundu sábadu de sestaferia nel Pueblu Exemplar d'Asturies 2021

A una selmana de la visita real, n'El Puertu, los preparativos nun paren. Un muru cayíu qu'hai qu'iguar o una valla nueva pa evitar cayíes inesperaes, son dalgunos de los trabayos que tienen pendientes.

Los arreglos tamién se faen de puertes p'adientro. Son díes de llimpieza y de pequeñes obres. Güei foi'l segundu sábadu de sestaferia y primero que lleguen los Reis van entamar una tercera.

Quieren que'l pueblu lluza la so meyor cara pa cunta-y a la familia real la hestoria d'unos vecinos arguyosos de la so tierra.

Anque la mayoría son ganaderos y van siguir cola so vida de siempre, saben que yá too cambió porque, como diz María Ganzo, camarera del Hotel Restaurán El Coronel', "agora asítiennos nel mapa, dientro del Parque Natural de Somiedu y va haber más llegada de xente". Anque, pa los vecinos d'El Puertu, el pueblu siempres foi exemplar.​