El rei diz que les lexítimes instituciones resolverán el "inaceptable intentu de secesión"

"Nengún proyectu de futuru se sofita na división de la sociedá"

El rei aseguró güei que Cataluña "ye y sedrá una parte esencial" d'España, y que les sos "lexítimes instituciones democrátiques" resolverán el "inaceptable intentu de secesión" dientro del respetu a la Constitución.

Felipe VI reafirmó la fortaleza del Estáu énte'l desafíu independentista nel so discursu na ceremonia d'entrega de los Premios Princesa d'Asturies celebrada nel Teatru Campoamor d'Uviéu.

El mensaxe pronunciólu en presencia del xefe del Gobiernu, Mariano Rajoy, y de les tres máximas autoridaes de la XE, el presidente de la Comisión Europea, Jean-Claude Juncker, el del Conseyu Européu, Donald Tusk, y el de la Eurocámara, Antonio Tajani, que recoyeron el Premiu a la Concordia concedíu a la XE.

"Nengún proyectu de futuru pue construyise basándose en romper la convivencia democrática. Nengún proyectu de progresu y llibertá se sofita na desafección, nin na división, siempre dolorosa y desgarradora de la sociedá, de les families y de los collacios. Y nengún proyectu pue conducir al aislamientu o al emprobecimientu d'un pueblu", alvirtió'l Rei énte'l plan independentista.

La intervención del xefe del Estáu foi la primera dende'l mensaxe estraordinariu que dirixó a los españoles el pasáu 3 d'ochobre, dos díes dempués de la votación illegal, y llega en víspera de que'l Gobiernu apruebe l'aplicación del artículu 155 pa poner frenu al proyectu de ruptura en Cataluña.

"España tien que facer frente a un inaceptable intentu de secesión nuna parte del so territoriu nacional y resolverálo al traviés de les sos lexítimes instituciones democrátiques, dientro del respetu a la nuestra Constitución y ateniéndose a los valores y principios de la democracia parllamentaria", proclamó don Felipe na so alocución.

Lloñe de que'l desafíu independentista ruempa'l país, el Rei garantizó que la España del sieglu XXI, "de la que Cataluña ye y sedrá una parte esencial", tien que basase "nuna suma lleal y solidaria d'esfuercios, de sentimientos, d'afectos y de proyectos".
Una suma, siguió, que "siga alimentando la nuestra vocación universal, el nuestru lexítimu arguyu de pertenecer a la gran realidá democrática que ye Europa".

Don Felipe entabló un paralelismu ente'l proyectu européu y el d'una España "cimentada nel deséu sinceru de convivencia y d'entendimientu, nel respetu de les normes y de les regles de la democracia, en reconocer con grandeza y xenerosidá los errores del pasáu pa nun cayer otra vuelta nellos".

Apelando a lo que foi la Transición, el Rei solliñó que la democracia cimentóse nuna España na que tolos ciudadanos, al marxe de la so procedencia o ideoloxía, tuvieren "la oportunidá d'alcontrar el so sitiu en paz y llibertá, ensin mieos, nin mieos a la imposición, nin l'arbitrariedá, alloñaos del rencor y les fractures".

Una España "abierta y solidaria" na que "pudieren reconocese toos y caún de los españoles" y na que los pueblos que la inxerten "vieren protexíes, reconocíes y respetaes les sos llingües, les sos cultures, les sos tradiciones y les sos instituciones".
Incidiendo nel momentu qu'anguaño vive'l país, don Felipe insistió a tener siempre presentes estos ideales, "como los que tuvieron na razón de ser de la XE".

"Poro, Europa, la Xunión Europa, forma parte del ser d'esa España y transciende a los Estaos con respetu a toles nuestres identidaes y sensibilidaes. Una Xunión que dea rempuesta a la modernidá, qu'indudablemente avanza pa una mayor integración y converxencia. Esi ye'l signu de los nuestros tiempos, del mundu en que vivimos", dixo.

Na gala de los Premios que más carga política tuvo de los últimos años, don Felipe recalcó que "los españoles nun escaecen, nin escaecerán", que la XE foi siempre un referente nel orixe y la consolidación de la democracia.