El rei homenaxea a la muyer rural pol so "esfuerzu y sacrificiu exemplares"

Reconocimientu al llabor de los vecinos de Mual por caltener les tradiciones

El rei rindió güei homenaxe al "insustituyible" papel de les muyeres del mundu rural por caltener la vida de caldía décades con "un esfuerzu y un sacrificiu exemplares" a pesar de tantes torgues a les que tuvieron que facer frente pola so condición social.

Felipe VI espresó esti reconocimientu na so visita, xunto a la reina Letizia, al pueblu de Mual, qu’esti añu foi premiáu col Premiu al Pueblu Exemplar d’Asturies 2018 en reconocimientu al llabor que’l so centenar de vecinos fai por caltener les tradiciones y la so privilexada contornada natural.

Según don Felipe, gracies a les muyeres, "la sociedá rural algamó caltenese, inclusive en mediu de tantes torgues, porque con valentía, con fortaleza, con optimismu y con gran cariñu", fueron de pasu les principales responsables de caldía, de la educación de los fíos y del cuidáu de la familia y los mayores.

"Agora, cuando tantes coses camudaron y siguen camudando pa bien na consideración social y del vuestru insustituyible papel, les muyeres del campu tais na vanguardia", emponderó’l xefe del Estáu na so intervención al valorar qu’ocupen puestos nel campu o nos pueblos que "enantes-yos fueron negaos".

A pesar de la so poca población, el pueblu, asitiáu nel conceyu suroccidental de Cangas del Narcea, cuenta con tres asociaciones, una d’elles, de muyeres, cola que los Reis tuvieron na so estancia pa poner en valir la so xera.

El percorríu pel Pueblu Exemplar, onde hebo tamién una curtia visita a la viesca de Muniel.los, punxo’l colofón a los actos nos que los Reis participaron dende’l xueves polos Premios Princesa d’Asturies.
...