Esperanza nel futuru

"La nuestra esperanza agora ye inspirar a la próxima xeneración de científicos, médicos y trabayadores sanitarios"

Les posibilidaes de les tecnoloxíes son infinites y dexen que se tean investigando formes de prevenir el VIH y la malaria, d’amenorgar el cáncer o de tratar munches otres enfermedaes poro, según la bioquímica húngara Katalin Karikó, hai qu’animar a les nueves xeneraciones a que s’inxerten nel camín de la investigación porque "los enfermos tán esperando".

Karikó foi la encargada güei d’agradecer nel Teatru Campoamor d’Uviéu’l Premiu Princesa d’Asturies d’Investigación Científica y Técnica dau a siete científicos que destacaron polos sos apurrimientos al desendolcu de les primeres vacunes que dexaron, nun tiempu récor, facer frente a la pandemia mundial provocada pol covid-19.

L’inmunólogu Drew Weissman y el bioquímicu Philip Felgner, los dos de los Estaos Xuníos; la vacunóloga británica Sarah Gilbert, el biólogu canadiense Derrick Rossi y el matrimoniu formáu polos doctores húngaros Ugur Sahin y Özlem Türeci compartieron escenariu cola que ta considerada madre de les vacunes basaes nel ARN mensaxeru, una tecnoloxía que nos años vinientes tamién esparderá l’usu de vacunes personalizaes pal tratamientu del cáncer y otres enfermedaes.

"La nuestra esperanza agora ye inspirar a la próxima xeneración de científicos, médicos y trabayadores sanitarios" afirmó nel Teatru Campoamor d’Uviéu dempués de recibir de manes del rei Felipe un galardón del que dixo tar "mui honrada", y más, pola "estraordinaria compañía".

Los siete científicos premiaos contribuyeron al desendolcu de les vacunes comercializaes por Pfizer, Moderna y AstraZeneca, tres de les primeres y de les que más se punxeron a la población europea y de los Estaos Xuníos y que tienen como blancu común la proteína "S", presente na superficie del virus y que facilita la so entrada a les célules.