Esposición de semeyes inédites del entornu de la Basílica de Cuadonga

L'amuesa pue visitase tol mes de xunetu na Casa de Cultura de Cangues d'Onís

Doscientes plaques fotográfiques captaes ente 1890 y 1910 retraten el procesu de construcción de la Basílica de Cuadonga, un proyectu que representó un gran desafíu técnicu, lloxísticu y económicu naquella dómina y que, dende güei, pue conocese gracies a la esposición 'Covadonga na mirada fotográfica de Daniel Álvarez Fervienza', que s'inauguró esta mañana na Casa de Cultura de Cangues d’Onís.

Hai una Cuadonga desconocida pa munchos, la del procesu de construcción. Munches hores de trabayu y l’esfuerzu d’unos canteros qu’algamaron llevantar ún de los símbolos más reconocibles de los asturianos: el Real Sitiu de Cuadonga.

Güei inaugúrase na Casa de Cultura de Cangues d'Onís una esposición con semeyes inédites del entornu del santuariu tomaes pol fotógrafu Daniel Álvarez Fervienza, por mor de los actos del 1.300 aniversariu de la Batalla. Precisamente’l comisariu de l’amuesa ye’l bisnietu del fotógrafu somedanu qu’exerció como maestru nel conceyu de Llanes.

Los visitantes queden ablucaos énte una perspectiva histórica, cultural y mediuambiental de Cuadonga que poques vegaes tienen la oportunidá d’escubrir.

​L’amuesa ta teniendo mui bona acoyida y pue visitase tou esti mes.