Karen Armstrong, premiu Princesa d'Asturies de Ciencies Sociales

Una referencia nel estudiu comparativu del islamismu, el xudaísmu y el cristianismu

La pensadora y investigadora británica Karen Armstrong, considerada una referencia internacional nel estudiu comparativu del islamismu, el xudaísmu y el cristianismu, foi premiada güei n'Uviéu col Premiu Princesa d'Asturies de Ciencies Sociales 2017.

La candidatura d'Armstrong, una de les venticinco procedentes de doce países qu'aspiraben al premiu, foi propuesta por Pedro Miguel Echenique, Premiu Príncipe d'Asturies d'Investigación Científica y Técnica 1998.

El xuráu decidió da-y el premiu a Armstrong por ser "una de les mayores autoridaes" nel conocimientu del xudaísmu, el cristianismu y l'islam, y por "la fondura de los sos análisis históricos".

Amás, con esta concesión, el xuráu quixo destacar "la relevancia del estudiu de les relixones pa comprender la sociedá y el mundu contemporáneos".

Oficial de la Orde del Imperiu Británicu, Armstrong recibió, ente otres distinciones, el Premiu TED (EE.XX., 2008), el Building Bridges de l'Asociación de Científicos Sociales Musulmanes (Reinu Xuníu, 2004) y el The Freedom of Worship de la Fundación Roosevelt y l'Institutu Roosevelt (EE.XX., 2008).

Nacida en 1944 en Wildmoor (Reinu Xuníu), Karen Armstrong ingresó nel conventu católicu de la Sociedá del Santu Neñu Xesús en 1962 y, siendo novicia, entamó los estudios na Universidá d'Oxford nel St. Anne's College.

En 1969 abandonó la vida relixosa y, más tarde, algamó la llicenciatura en Lliteratura Contemporánea.

Foi, de 1973 a 1976, profesora nel Bedford College de la Universidá de Londres y ente 1976 y 1981, profesora d'inglés y xefa de Departamentu na Escuela Femenina James Allen (Dulwich, sur de Londres).

Foi profesora de Cristianismu nel centru rabínicu Leo Baeck College de Londres, y dende 2005 ye miembru del Grupu d'Altu Nivel de l'Alianza de les Civilizaciones, una iniciativa de la ONU.

El so primer llibru foi Through the Narrow Gate (1982), relatu autobiográficu que siguió en The Spiral Staircase (2004).

Les sos obres Una historia de Dios: 4.000 años de búsqueda en el Judaísmo, el Cristianismo y el Islam (1993) y The Battle for God: Fundamentalism in Judaism, Christianity and Islam (2000) fueron éxitos de ventes.

Amás, ye autora d'otros 20 títulos más sobre la fe, les principales relixones, los elementos comunes ente elles, y el papel que xueguen nel mundu modernu.

Ente les sos obres, que fueron traducíes a numberosos idiomes, destaquen Holy War: The Crusades and Their Impact on Today's World (1988), Historia de Jerusalén: una ciudad y tres religiones (1996), La gran transformación: El principio de nuestras tradiciones religiosas (2006) y Historia de la Biblia (2007).

Los sos estudios y llibros sobre l'islam -Mahoma: biografía del profeta (1991) foi'l primeru- diéronla a conocer como pensadora y investigadora ente la comunidá musulmana de Reinu Xuníu y Estaos Xuníos.

El premiu de Ciencies Sociales recayó'l pasáu añu na historiadora británica Mary Beard, catedrática de Clásiques nel Newhham College de la Universidá de Cambridge y responsable de delles series pa la BBC sobre'l mundu clásicu.

N'años anteriores lleváronlu, ente otros, la economista francesa Esther Duflo, l'hispanista francés Joseph Pérez, la socióloga holandesa Saskia Sassen, la filósofa estadounidense Martha Nussbaum, el psicólogu estadounidense y profesor de la Universidá d'Harvard Howard Gardner o l'equipu arqueolóxicu de los Guerreros y Caballos de Terracota del Mausoléu de Qin Shihuang (China).

Esti foi'l quintu de los ocho premios que se conceden nos XXXVII Premios Princesa d'Asturies tras los d'Artes al artista sudafricanu William Kentridge, el de Comunicación y Humanidaes al grupu musical y humorísticu Les Luthiers, el de Cooperación Internacional a la Hispanic Society of America y el de los Deportes a la selección de rugby de Nueva Zelanda.

Nes tres próximes selmanes fallaránse, per esti orde, los correspondientes a Lletres; Investigación Científica y Técnica; y Concordia.