L'arte 'cincuenter' llibérase na antigua cárcel d'Uviéu

La esposición visibiliza'l papel de les muyeres na cultura

'Alcuentros Cincuenter', l'eventu qu'asitia a Uviéu como la capital de la cultura de les muyeres mayores de 50 años, entamó esti vienres cola inauguración d'una esposición nel Archivu Históricu d'Asturies que visibiliza'l papel de les muyeres na cultura.

L'antigua cárcel d'Uviéu alluga esti fin de selmana una amplia gama d'intervenciones artístiques producíes por muyeres 'cincuenter' por parte de Barruntando con "Distopía", Carmela Berrini y "Hilo de Ariadna", el grupu Decero Creativo y "La vida tendida", Enma Bi con "Persona", Maite Centol y los sos "45 Self-portrait" y Beatriz Montes con "Fichadas".

Les celdes que per décades enxaularon a los presos güei sirven como un símbolu de llibertá pa les muyeres mayores de 50 años, qu'atopen nelles y nel patiu esterior el llugar afayadizu pa presentar les distintes creaciones artístiques que componen la esposición.