La Hispanic Society of America, Premiu Princesa d’Asturies de Cooperación

El xuráu valora’l so papel na promoción de la cultura y valores de lo hispano y llatino

La Hispanic Society of America foi merecedora güei del Premiu Princesa d’Asturies de Cooperación Internacional 2017 pol so papel na promoción de la cultura y valores de lo hispano y lo llatino, según destacó’l xuráu, que dio a conocer el fallu n’Uviéu.

L’acta, lleida pol presidente del xuráu, l’ex-ministru d’Asuntos Esteriores Marcelino Oreja, resaltó la importancia del llabor de la Hispanic Society of America "nun momentu nel que la cultura hispana, reflexada en millones de persones, ta lluchando por caltener la so presencia y vigor en toa América, con una mui relevante proyección pal futuru".

La Hispanic Society of America, una entidá cultural con sede en Nueva York, candidatura propuesta pol embaxador d’España nos Estaos Xuníos, Ramón Gil-Casares, nació col oxetivu d’establecer un muséu, una biblioteca y una institución educativa d’accesu públicu y de baldre, destinaos a avanzar nel estudiu de la llingua, la lliteratura y la historia d’España y Portugal, asina como de los países nos que l’español y el portugués fueron o siguíen siendo falaos.

El xuráu, presidíu pol ex-ministru d’Asuntos Esteriores Marcelino Oreja, dio-y el premiu a la Hispanic Society of America, ente un total de diecinueve candidatures procedentes de nueve países, pol so papel na promoción de la cultura y valores de lo hispano y lo llatino.

Anguaño, el so muséu tien más de 23.000 exemplares únicos, ente los que se cuenten cuadros, escultures, pieces de cerámica, testil o muebles, que van dende’l Paleolíticu hasta’l sieglu XX.

La colección pictórica de la institución tien obres como’l retratu de "La Duquesa de Alba", de Goya; "El cardenal Camillo Astalli", de Velázquez; "La Piedad", d’El Greco, y hasta una sala con grandes murales pintaos por Joaquín Sorolla.

Amás, la so biblioteca tien al rodiu de 175.000 semeyes, asina como numberosos llibros raros vinientes d’Iberoamérica, de los que más de 30.000 exemplares son d’enantes de 1830, y ente ellos hai al rodiu de 250 incunables.

Tamién cunta con una biblioteca d’investigación con más de 300.000 volúmenes de delles materies como lliteratura, belles artes, xeografía, historia y cultura hispánica.

Nes sos sales malapenes ta espuestu al rodiu del cinco por cientu de tola colección y, amás, fomenta’l conocimientu de la cultura hispánica al traviés de programes educativos orientaos a escolinos, conciertos o dances, asina como cola cooperación cultural, faciendo collaboraciones y intercambios con dalgunos de los museos y instituciones culturales más importantes del mundu.

Parte d’esta colección, unes 200 obres, tán espuestes nel Muséu del Prado, dende’l pasáu 4 d’abril y hasta’l viniente mes de setiembre, nuna muestra titulada "Visiones del mundu hispánicu. Tesoros de la Hispanic Society of America", qu’axunten más de 4.000 años d’historia.
L’añu pasáu algamaron esti premiu la Convención Marcu de Naciones Xuníes del Cambéu Climáticu (UNFCC) y l’Alcuerdu de París, que s’amestaron asina a una nómina na que s’alcuentren, ente otros, Wikipedia; la Fundación Fulbright; la sociedá Max Planck; la Cruz Roja y de la Media Luna Roja; Al Gore; la Fundación Bill y Melinda Gates; Helmut Kohl; Mario Soares; Isaac Rabin y Yaser Arafat, o Frederick De Klerk y Nelson Mandela.

Esti ye’l terceru de los ocho premios convocaos pola Fundación Princesa d’Asturies que se falló na so XXXVII edición, dempués de que’l de les Artes fuere pal polifacéticu creador sudafricanu William Kentridge y el de Comunicación y Humanidaes pal grupu humorístico-musical arxentín Les Luthiers.