La ONG de José Andrés reparte miles de compres na llende ente Polonia y Ucraína

El chef asturianu califica a Putin como un "matón" nes sos redes sociales

La ONG World Central Kitchen del chef asturianu José Andrés foi a la llende ente Ucraína y Polonia p'alimentar a les persones que tán saliendo del país atacáu pol Gobiernu rusu de Vladímir Putin, al que'l cocineru calificó como un "matón" nes sos redes sociales.

Al traviés de Twitter, la ONG anunció qu'anguaño ta na estación de tren ente la llende d'Ucraína y Polonia "onde duermen munches families" y la so intención ye ampliar los esfuerzos "rápidamente pa sirvir a cientos de miles equí y en Rumanía".

"¡Construyamos una mesa más llarga, nun bombardiemos a toos!", afitó José Andrés, quien amás escribió: "¡Ye tan triste ver cómo les Democracies del mundu miren pal otru llau! Putin ye un matón....y tamos dexándolu masacrar al hermanu pequeñu....cuando nos callamos y miramos pa un llau, ¿los malos siempre ganen?".

N'otru mensaxe, el cocineru amestaba que siente que se debería entrar n'Ucraína como lo fadría Gandhi y sentanos frente a les fuerces ruses y dici-yos: amámoslos. ¡Nun tienes que facer esto! Putin nun ye Rusia".

En respuesta a les peticiones en redes pal unviu de donativos pa la causa, Andrés pidió paciencia porque "coles botes sobre'l terrén deprenderemos más sobre qué y cómo ayudaremos".

El chef asturianu fundó nel añu 2010 xunto a la so esposa la ONG World Central Kitchen (WCK) col oxetivu de "usar los alimentos pa empoderar a les comunidaes y fortalecer les economíes", y foi galardonáu pol so llabor humanitariu col Premiu Princesa d'Asturies de la Concordia en 2021; na pandemia del coronavirus repartió más de tres millones de comíes n'España y más de 30 millones n'Estaos Xuníos.