La Unesco retrasa la evaluación de la cultura sidrera al próximu añu

L'eleváu númberu de propuestes d'otros países, detrás de la decisión de la organización mundial

La Unesco va evaluar la candidatura de la cultura sidrera asturiana a patrimoniu mundial nel periodu 2023-2024, énte l'eleváu númberu de propuestes que recibió pal ciclu actual (2022-2023) de países con menor presencia qu'España na Llista Representativa de Patrimoniu Inmaterial.

Según informó nun comunicáu'l Gobiernu del Principáu, la posibilidá de que la candidatura nun pudiera ser evaluada nesti ciclu yera esperada, pol procedimientu d'aceptación d'espedientes por países de la Unesco.

El secretariu de la Convención pa Salvaguardar del Patrimoniu Cultural Inmaterial comunicó ayeri esta decisión a la Embaxada d'España énte la Unesco.

La normativa interna del organismu internacional afita que cada añu evalúense namás 55 candidatures de les presentaes polos distintos países de la Convención de Patrimoniu Mundial Inmaterial.

Amás, da prioridá a les naciones con escasa o nula presencia na Llista Representativa, na qu'España cunta yá con 20 elementos distinguíos. D'esta miente, la candidatura española de la cultura sidrera va analizase nel próximu periodu, yá que cada Estáu tien derechu a qu'unu de los sos espedientes s'analice cada dos ciclos.