La casa natal y el bustu del Xeneral Riego en Tuña, Llugar de Memoria Democrática

Riego estudió lleis na Universidá d'Uviéu y entamó la so carrera militar na Guardia Real

La Secretaría d’Estáu de Memoria Democrática declaró Llugar de Memoria Democrática la casa natal y el bustu del Xeneral Riego en Tuña, en Tinéu, según recueye esti sábadu’l Boletín Oficial del Estáu.

Nacíu’l 7 d’abril de 1784 en Tuña, Rafael de Riego foi un destacáu militar qu’algamó’l grau de xeneral y convirtióse nuna figura clave del lliberalismu n’España dempués de protagonizar la sublevación de Cabezas de San Juan, que restauró la Constitución de 1812 y entamó la etapa conocida como’l Trieniu Liberal.

Riego estudió lleis na Universidá d’Uviéu y entamó la so carrera militar na Guardia Real. Dempués de lluchar escontra les tropes franceses na Guerra de la Independencia, foi prisioneru en Francia, onde afitó la so ideoloxía lliberal y, dempués de volver a España, en 1820 llideró’l pronunciamientu que punxo fin a la primer restauración absolutista de Fernando VII, entamando’l Trieniu Lliberal.

Nesti periodu, foi presidente de les Cortes y defendió’l réxime constitucional frente a la restauración absolutista de Fernando VII, qu’a la fin trunfó.

Capturáu y aforcáu en 1823, la so memoria foi rehabilitada dende 1835 y el so himnu popularizóse na II República Española al ser declaráu himnu nacional.