La editorial La Fabriquina presenta'l llibru 'Asturianas'

Una compilación que reivindica'l papel de grandes figures femenines de la nuestra comunidá

La editorial La Fabriquina presenta güei’l so primer llibru pa públicu adulto. Sedrá na Llibrería Paradiso de Xixón a les 19:00.

La obra, titulada 'Asturianas' y escrita por Alicia Álvarez ye una compilación que reivindica’l papel de grandes figures femenines de la nuestra comunidá que sufrieron invisibilidá. Venti iconos y referentes tan conocíos como Corín Tellado o Margarita Salas pero tamién otres como La Busdonga o Xuaca Bobela.

El llibru ye una mirada feminista pa dientro, pa la nuestra comunidá, p’asturianes con mayúscula, porque na nuestra historia hubo grandes referentes, muyeres qu’algamaron grandes llogros.

Una selección complicada que podría dar inclusive pa más volúmenes. 'Asturianas' busca tamién descubrir la parte menos conocida de la biografía de dalguna de les sos protagonistes.