La princesa Leonor: "Un pueblu ye un bon llugar pa l'anovación tecnolóxica y social"

"A ver si deprendo yá a escanciar"

La princesa Leonor destacó esti sábadu’l llabor d’aquellos pueblos que s’enfoten en revitalizar el so territoriu amestando los avances de la tecnoloxía y el respetu a la cultura local y amosóse convencida de que “los pueblos tamién son un bon llugar pa l’anovación tecnolóxica y social”.

Acompañada polos reis y la infanta Sofía, la heredera al tronu visitó’l pueblu exemplar d’Asturies, qu’esta vegada recayó en tres parroquies -Arroes, Pion y Candanal- del conceyu de Villaviciosa nes que viven un millar d’habitantes, dedicaes sobre manera a la ellaboración de sidra y a la ganadería.

Pa la princesa, los vecinos d’estos pueblos exemplifiquen “lo que’l trabayu constante y la pasión son capaces d’algamar”.