La princesa Leonor reivindica'l papel de la mocedá

Ha ser "importante" p'algamar un mundu "más sostenible, más xustu y meyor pa toos"

La princesa Leonor reivindicó esti vienres el papel de la mocedá, de la qu’aseguró que "tien abondo qu’apurrir" y ha ser "importante" p’algamar un mundu "más sostenible, más xustu y meyor pa toos".

Leonor de Borbón, acompañada polos reis y la infanta Sofía, protagonizó’l so tercer discursu na ceremonia de los Premios Princesa d’Asturies, qu’esti añu volvieron a celebrase nel Teatru Campoamor d’Uviéu dempués de que na anterior edición fuere nel Hotel Reconquista pola pandemia.

"Allégrame a esgaya volver a Uviéu pa celebrar la entrega de los nuestros premios. Siempres vi a mios padres nesti escenariu reconocer el trabayu bien fechu y les iniciatives y les idees que faen meyorar a les sociedaes", entamó les sos pallabres la princesa d’Asturies, que n’inglés, felicitó a los galardonaos y agradeció-yos la so presencia.

La primoxénita de los reis solliñó que los premiaos son "guía imprescindible pa toos" al emponderar que "la cultura, la ciencia, la solidaridá son esenciales pa la vida en común".