La reina Sofía espresa'l so sofitu a los enfermos nel X Congresu Nacional d'Alzheimer

La Confederación Española d'Alzheimer pide que s'incluyan nueves terapies nel sistema nacional de salú

La reina Sofía asistió esti xueves en Xixón a la inauguración oficial del X Congresu Nacional d'Alzheimer, qu'axunta hasta'l sábadu a mediu millar de persones, pa espresar el so sofitu a los afectaos y interesase poles últimes llinies d'investigación sobre esta enfermedá cola que conviven 1,2 millones de persones n'España.

La cita entamada sol lema "Integrando la innovación" axunta a profesionales, entidaes, voluntarios, enfermos y los sos familiares y ta entamada pola Confederación Española d'Alzheimer y otres Demencies (CEAFA), entidá de la que la monarca emérita ye presidenta d'honor.

La reina Sofía presidió l'actu oficial d'inauguración del congresu xunto con distintes autoridaes de la comunidá y asistió a la ponencia del director científicu de la Fundación Centru d'Investigación d'Enfermedaes Neurolóxiques (CIEN), Pascual Sánchez, sobre "La importancia del trabayu en rede pa frenar l'Alzheimer".