La tranquilidá reina en Poreñu

El pueblu trabaya nos preparativos del que va ser un día históricu

Llueñe del estreldu del Hotel la Reconquista, el día trescurre en Poreñu col ritmu pausáu propiu de los pueblos, pero baxo esa apacible tranquilidá, hai un trabayu intensu pa que mañana too tea llisto pa recibir el premiu al Pueblu Exemplar d'Asturies.

Nel llugar nun queda un requexu al que nun se-y diera llustre. Los vecinos yá perdieron hasta la cuenta de les vegaes que repasaron toos xuntos esta aldea maliaya pa tenela impoluta.

Mañana va ser un día históricu y irrepetible y que dalgunos creíen una quimera. Asina que desque supieron que diben ser Pueblu Exemplar cuelguen de ventanes y balcones banderes d'España y d'Asturies, y una nueva, verde, que conmemora que son Pueblu Exemplar.

El trasiegu esta mañana fíxose sentir peles caleyes del pueblu cola presencia de la Guardia Civil faciendo'l percorríu que mañana van facer los reis. Tamién hebo operarios de la llimpieza y otros operarios, los que tán instalando l'escenariu sobro'l que va tener llugar la ceremonia oficial d'entrega del galardón.

Mañana los servicios de tresporte van funcionar perfectamente con Poreñu pa que tol mundu que quiera averase puea facelo anque con dalguna qu'otra restricción.