La venezolana María Elena Morán faise col premiu de novela Café Xixón

Gonzalo Barreñada, premiu Xosefa Xovellanos de novela n'asturianu por 'El viaxe del cacique'

Hai nueva ganadora del Premiu de Novela Café Xixón. Ye la escritora venezolana María Elena Morán, qu’algamó’l galardón pola novela 'Volver a cuándo'. Nella amuésense les consecuencies sociales del postchavismu nuna familia venezolana que tien qu’abandonar el país.

El xuráu resaltó’l so altu valor lliterariu con una escritura coloquial, de gran musicalidá y con atopamientos espresivos mui suxerentes.

María Elena Morán, dende Brasil, amosóse mui sorprendida pol premiu y aseguró qu’escribió esta novela con muncha honestidá. Morán ye autora de cuentos y asoleyó la so primer novela l’añu pasáu.

A esta edición del Premiu Café Xixón, con 20.000 euros de premiu, presentáronse más de 700 manuscritos.

Otru premiu. L’escritor de Sotrondio Gonzalo Barreñada ganó’l Xosefa Xovellanos de novela n’asturianu con 'El viaxe del cacique'.

El xuráu destaca la solidez d’esti relatu históricu con elementos de xéneru de caballeríes. El galardón, convocáu pola Conseyería de Cultura, ta dotáu con 6.000 euros y la publicación de la novela ganadora.