Los reis y la princesa Leonor visiten Cadavéu, Pueblu Exemplar d'Asturies

La gastroenteritis de la princesa y la infanta marca la visita al pueblu

La visita de la familia real a Cadavéu, el Pueblu Exemplar d’Asturies d’esti añu, viose alterada esti sábadu pola gastroenteritis sufrida pola princesa Leonor y la infanta Sofia, qu’obligó a la primera a retirase a metá del percorríu y a la so hermana a nin siquiera viaxar dende Uviéu.

Como ye tradición, el desplazamientu al pueblu exemplar yera’l ramu a la estancia de los reis y les sos fíes nel Principáu dempués de la ceremonia de los Premios Princesa d’Asturie celebrada ayeri, vienres, nel Teatru Campoamor.

La comitiva llegó a Cadavéu con una hora de retrasu y ensin la infanta, al informar la Casa Real que taba indispuesta dempués de pasar una mala nueche.

Con una xota como bienvenida, don Felipe, doña Letizia y la princesa entamaron el percorríu pel pueblu, asitiáu na costa occidental asturiana pa conocer les sos costumes, observar les sos casones y horros y charrar colos vecinos, munchos d’ellos vistíos con traxes tradicionales.

Trescurrida una hora de visita, la familia real llegó a la casa natal del padre Galo (1884-1939), ún de los poetes más importantes en llingua asturiana, onde-yos dieron probar la rapa, una torta de fariña de maíz fecha con productos del cerdu cocida al fornu, y l’alfilada, un bollu de pascua dulce que regalaben los padrinos a los sos afiaos.

La siguiente parada foi’l prau asitiáu nel centru’l pueblu, onde diben a tener llugar les intervenciones del rei y de la princesa.

Sicasí, el guión alteróse y la reina Letizia tomó’l micrófonu pa dar anuncia de que la heredera al tronu retirábase de la visita por problemes d’estómadu.

“Taba regular al llevantase. Fizo un esfuerzu, pero nun pudo ser. Supongo que la gastroenteritis pasará en 24 ó 48 hores. Daqué-y sentó mal”, desveló doña Letizia, que lleó’l discursu que diba pronunciar la so fía mayor.

Felipe VI tamién llamentó’l percance: “Fizo un gran esfuerzu por tar equí. Aguantó hasta que pudo”.