Mozos de l'Asociación Síndrome Down trabayen na Selmana de los Premios​

Una oportunidá de contribuyir a la meyora de la so calidá de vida y la so integración llaboral y social

La Fundación Princesa d'Asturies ayudó a que les persones con discapacidá intelectual puean incorporase al mercáu llaboral. Cinco de los auxiliares contrataos pa la Selmana de los Premios pertenecíen a l'Asociación Síndrome de Down Asturies, una oportunidá única pa dar visibilidá, pero sobre manera pa contribuyir a la meyora de la so calidá de vida y la so integración llaboral y social.

Francisco José Arévalo 'Pico', de 28 años, foi unu de los mozos qu'estos díes incorporó una esperiencia más al so curriculum. Una vivencia pa fomentar la so capacitación na que con simpatía se desendolcó nel centru de prensa.

N'otru de los puntos neurálxicos, na Fábrica d'Armes de La Vega​ otru compañeru. Manuel Piedra, sierense de 22 años, encárgase de controlar entraes, una xera na que se remanó.

Empleos col sofitu de los sos preparadores que los formaron pal puestu, garrando habilidaes y competencies.

Dende l'Asociación Down Asturies lleven 17 años fomentando inxertamientos llaborales n'empreses ordinaries. Creen que la sensibilidá aumentó, pero tanto pequeñes empreses como alministraciones y asociaciones podríen faer más y asina ayudar a qu'estes persones seyan más independientes y llogren les sos metes.

La so inclusión nel equipu de la Fundación Princesa foi total y esperen repitir el próximu añu.