Mual, Premiu al Pueblu Exemplar d’Asturies 2018

El xuráu valora la dedicación y trabayu de los habitantes por caltener les tradiciones

El pequeñu pueblu de Mual, perteneciente al conceyu de Cangas del Narcea, nel suroccidente asturianu, foi premiáu güei col Premiu al Pueblu Exemplar d’Asturies 2018.

Mual, con 101 persones censaes y asitiáu a les puertes d’unu de los carbayeos meyor conservaos d’Europa, la viesca de Muniel.los, toma asina’l testigu, na ventenu novena edición d’esti premiu dau pola Fundación Princesa d’Asturies, del pueblu de Poreñu, en Villaviciosa, ganadora l’añu pasáu.

El xuráu, que dio a conocer el premiu n’Uviéu, valoró la dedicación y trabayu de los habitantes de Mual por caltener les tradiciones, conservar y recuperar el so patrimoniu, protexer la so contornada natural, meyorar la so calidá de vida, asina como por motivar la vuelta de los emigraos y atraer turistes.

Con güelgues d’asentamientos de la dómina castreña y asitiáu nun valle estrenchu pel que pasa El Ríu Muniel.los, Mual tuvo históricamente venceyáu al so aprovechamientu madereru, esplotáu polos condes de Toreno pa la construcción naval nos sieglos XVIII y XIX.

En 1982 foi declaráu Reserva Biolóxica Nacional y, en 2002, Reserva Mundial de la Biosfera pola UNESCO.

A pesar de contar anguaño namái con un centenar de vecinos, Mual cuenta con tres asociaciones, la Cultural, la Deportiva y la de Muyeres, que sumen cuasi doscientos socios y qu’organicen abondes xeres, la más renomada la Carrera de Monte Puerta de Muniel.los.

L’Asociación de Muyeres de Mual creóse en 2002 y organiza abondes xeres, cursos y talleres que faciliten la integración interxeneracional de les sos socies.

L’Asociación Cultural de Mual fundóse en 2009 cola fin de reavivar les fiestes patronales de San Xuliano y San Xulianín y la Deportiva nació en 2012, dempués de la primer edición de la Carrera de Monte Puerta de Muniel.los.

Ye una carrera que va pela viesca de Mual, rozando la reserva de Muniel.los, y que dende 2015 tien la participación restrinxida a trescientos dorsales, que se rifen ente los preinscritos, que suelen superar el millar.

Nos preparativos, les tres asociaciones divídense’l trabayu, dende la preparación de xinta y llevar la barra del bar, hasta les xeres de llimpieza y preparación del percorríu.

La popularidá qu’algamó la carrera fizo que más del 60 por cientu de los miembros de l’Asociación Deportiva seyan de fuera’l pueblu.

Mual tamién destaca pol so patrimoniu arquitectónicu, formáu por corripies –cercaos de piedra circulares p’almacenar los oricios de les castañes–, cortinos –zarraos pa protexer los truébanos–, el molín d’agua, el llavaderu y la escuela, asitiada nel barriu d'El Cascarín.

El premiu, de 25.000 euros, lleva apareyada la tradicional visita que faen al pueblu premiáu los reis d’España un día dempués de dar n’Uviéu los premios Princesa d’Asturies.