Plácido Arango robla la donación de 29 obres maestres de la so colección al Belles Artes

El filántropu asturmexicanu manifiesta la so intención de siguir collaborando

El filántropu astur-mexicanu Plácido Arango Arias, que güei robló'l documentu de donación de 29 obres al Muséu de Belles Artes d'Asturies, señaló que-y gusta más ver los cuadros nes pinacoteques que na so propia casa.

Arango, y el conseyeru d'Educación y Cultura del Principáu, Genaro Alonso, participaron na firma del documentu oficial de donación a la pinacoteca asturiana, considerada la sesta d'España, d'unes obres correspondientes a 28 artistes españoles realizaes ente 1485 y 1992.

Na so intervención, l'empresariu y ex-presidente de la Fundación Príncipe d'Asturies nun refugó la donación d'una obra más, perteneciente al sieglu XVIII, pa completar esta colección que va dende'l sieglu XV al XX.

Pela so parte, el conseyeru sorrayó que'l de güei ye "un día históricu" pa la institución al recibir un conxuntu de "valir incalculable" venceyáu a la hestoria del arte español.

Con esta firma cierra'l procesu alministrativu previu a la recepción y esposición de les obres, que ta previsto que se presenten con una esposición nel muséu uvieín ente finales del próximu mes d'abril y la conclusión de 2017.

La donación ta dedicada a la memoria de los sos padres, Jerónimo Arango Díaz y María Luisa Arias Fernández, d'orixe asturianu y de calter similar a la que'l filántropu ástur-mexicanu fizo en 2015 al Museo del Prado y en dambos el donante caltién el derechu a usufructu vitaliciu.

Arango destacó la dificultá pa escoyer la obres convenientes pa donar a la pinacoteca asturiana y apuntó que pa ello emplegó "dos años de trabayu" cola collaboración de dellos amigos, ente los que destacó al ex-presidente del Principáu Pedro de Silva, presente nel actu.

El director del Muséu, Alfonso Palacio, coincidió col conseyeru na "estraordinaria arrogancia y l'exemplar mecenalgu d'Arango pa donar estes obres nun xestu nel que nun pidió contrapartíes de nenguna triba".

Con esta donación, apuntó'l conseyeru d'Educación, "Arango pasa a encabezar la nómina más selecta de donantes que contribuyeron a aumentar la calidá de la pinacoteca" de la que foi nomáu Patronu d'Honor, una decisión pola que dixo sentise "afortunáu" y que-y dexará tener voz, pero non votu, nes decisiones de la pinacoteca.

La colección va incorporar a dieciocho autores hasta agora non representaos nel muséu asturianu, ente los que figuren Juan de Juanes, Juan van der Hamen, Jerónimo Jacinto Espinosa, Juan de Valdés Leal, Antoni Tàpies, Manuel Millares, Rafael Canogar o Eduardo Arroyo.

Amás, otros autores -ente ellos Zurbarán, Zuloaga o Gutiérrez Solana - taben yá representaos por aciu de depósitos de colecciones públiques o particulares o yá figuraben nos fondos y la donación dexa, según el director del Muséu, Alfonso Palacio, "desaniciar les llagunes esistentes y reforzar de manera escepcional lo yá presente".

Destaca pola so calidá y magnitú -5 metros d'altu por 3,90 d'anchu- el Retablo de la Flagelación de Leonor de Velasco, del sieglu XV, amás de la presencia de dos escultures d'autores contemporaneos como Juan Muñoz y Cristina Iglesias.

Bona parte de les obres, que presenten un escelente estáu de caltenimientu, fueron recuperaes por Plácido Arango pal patrimoniu español nel so llabor de coleccionista por aciu de la so alquisición a coleccionistes estranxeros.