Presentación del llibru 'El Tren de la libertad' na Escuela de Comerciu de Xixón

Sestu aniversariu de la protesta feminista en Madrid pa esixir la retirada de la Llei del Albuertu

Esti sábadu cúmplense seis años de 'El Tren de la libertad', la histórica protesta feminista que surdió de colectivos asturianos y qu'axuntó a cientos de persones en Madrid escontra de la reforma de la Llei del Albuertu de 2014.

Por cuenta de esti aniversariu, güei preséntase na Escuela de Comerciu de Xixón un llibru que rescata tola organización que llevó a materializar aquelles acciones.

Nun podía tener otru títulu distintu que'l que s'usó pa bautizar un movimientu feminista nel que participaron 30.000 persones en pos del derechu al albuertu.

Un finxu históricu que surdió de La Tertulia Feminista Les Comadres y de Muyeres pola Igualdá de Los Barredos. Dos colectivos feministes asturianos qu'acabaron recibiendo sofitu d'otres asociaciones a nivel nacional y internacional pa llevar alantre'l so propósitu, una gran protesta en Madrid pa esixir la retirada de la Llei del Albuertu presentada pol entós ministru de Xusticia Alberto Ruiz Gallardón.

Una obra colectiva coordinada por Cármen Suárez, actual Conseyera d'Educación y entós participante nel movimientu. Nesti llibru recuéyese cómo se llexisló l'albuertu nel Estáu español dende finales del sieglu XIX hasta anguaño y tamién el sentir de les participantes.