Siero espliega un dispositivu especial de seguridá nes fiestes d'El Carmín

Programaos tres servicios de trenes especiales de La Pola (Siero) con Nava y Uviéu

El Conceyu de Siero esplegó un dispositivu especial de seguridá poles fiestes d'El Carmín, que se van celebrar ente esti xueves y el 23 de xunetu, periodu nel que se va reforzar la presencia d'efectivos de Protección Civil, Policía Nacional y Local, Guardia Civil, Cruz Roja y Serviciu d'Emerxencies del Principáu.

Amás de medrar el númberu d'axentes de la policía local, que va tener cinco efectivos pela mañana, 14 pela tarde y cinco pela nueche, el conceyu va cuntar con una ventena de voluntarios de Protección Civil de Siero, Piloña y Llaviana.

El llunes 22, día de la romería, va habilitase tamién un hospital de campaña cabo'l Mercáu Nacional de Ganáu, según anunció esti xueves el conceyu.

Tamién va haber dellos ‘Puntos Lila', llugares seguros d'información pa muyeres, y un centru d'atención pa posibles víctimes d'abusos sexuales, na redolada del Parque Alfonso X y, el día de la romería, na entrada del prau d'El Carmín.

Según l'alcalde de Siero, Ángel García, el "trabayu conxuntu" de los distintos cuerpos de seguridá va dexar que "too vaya con normalidá" nunes fiestes nes que ta seguru de que los asistentes van tar en "bones manes".

Por cuenta d'El Carmín, el Conceyu comunicó que va haber restricciones p'aparcar y pa circular per dellos puntos de la ciudá y que s'habilitaron 300 places d'aparcamientu nel mercáu de ganáu.

Trenes especiales de Renfe

Pela so parte, Renfe programó tres servicios de trenes especiales de La Pola con Nava y Uviéu na madrugada del 23 de xunetu.

El primeru d'ellos va salir a les 4:00 dende La Pola con destín a Nava, con una llegada programada a les 4:24, el segundu va partir de Nava a les 4:30, con llegada a Uviéu a les 5:39; y l'últimu tren va conectar la parroquia sierense con El Berrón y va salir a les 6:35.