Sylvia Earle, Premiu Princesa de la Concordia 2018

El xuráu destaca la dedicación d’Earle a la conservación de los mares

La oceanógrafa de los Estaos Xuníos Sylvia Earle, nomada "Héroe del planeta" en 1998 pola revista de los Estaos Xuníos Time y autora de numberosos documentales pa National Geographic, foi premiada güei n’Uviéu col Premiu Princesa d’Asturies de la Concordia 2018.

El xuráu destacó la so dedicación a la conservación de los mares, "unu de los desafíos medioambientales del nuestru tiempu".

La candidatura d’Earle, que fizo la so primer inmersión submarina con diecisiete años y entovía ta n’activu a los sos 72 años, foi propuesta pol investigador Amador Menéndez Velázquez, miembru del xuráu del Premiu Princesa d’Asturies d’Investigación Científica y Técnica.

Earle (Gibbstown (Nueva Jersey), 1935) ye una bióloga marina y esploradora que dedicó la so vida al estudiu de la situación de los océanos que colaboró amás nel estudiu de los daños causaos por dellos derrames de petroleu como los qu’hebo dempués de la primer Guerra del Golfu en 1991 o los provocaos polos buques Exxon Valdez y Mega Bord o la plataforma Deepwater Horizon.

Llicenciada pola Universidá de Florida y doctorada na de Duke, Earle desendolcó’l so llabor investigador na Academia de Ciencies de California y en centros universitarios como California en Berkeley, l’Institutu Radcliff y Harvard, foi miembru ente 1980 y 1984 del Comité Presidencial Asesor sobre Océanos y Atmósfera, y en 1985 fundó la empresa Deep Ocean Engineering pa diseñar, dirixir, sofitar y asesorar sobre sistemes submarinos robóticos.

En 1990 foi designada científica xefe de l’Alministración Nacional Oceánica y Atmosférica de los Estaos Xuníos, cargu que desempeñó dos años, y anguaño ye esploradora residente de la National Geographic Society (NGS) y preside The Sylvia Earle Alliance (SEAlliance)/Mission Blue, que punxo en marcha en 2008.

Tamién forma parte de dellos conseyos, fundaciones y comités rellacionaos cola investigación marina y la conservación.

Oceanógrafa, investigadora, xestora y docente, Sylvia A. Earle, conocida como la "dama de les profundidaes", dedicó la so vida a la esploración y investigación de los fondos marinos y a la conservación de los océanos.

Con más de cien epediciones feches per tol mundu y más de 7.000 hores de bucéu nes sos investigaciones, en 1970 encabezó el primer equipu de muyeres aquanautes nel Proyectu Tektite, nel que vivieron dos selmanes a 18 metros de profundidá nes Isles Vírxenes, y tien un récor d’inmersión en solitario a 1.000 metros.

Participó en producciones televisives y pronunció conferencies en más de 90 países y el documental "Mission Blue", nel que se repasa la so trayectoria, ganó en 2015 el News & Documentary Emmy Award for Outstanding Editing-Documentary and Long Form.