TPA anueva la so imaxe de marca con pieces de continuidá basaes n'obres de pintores asturianos

Un cuidáu llabor de grafismu que quier ser un venceyu cola pintura y los museos

Entrar en 'Los carboneros' de Juan Martínez Abades pa faenos sentir nel vieyu cai de Xixón un día de 1904 o tamién sostener la mirada, al traviés del tiempu de los pescadores de mariscu que pintó Álvarez Sala en 1912. Son dos exemplos de les 13 pieces de continuidá que dende esti llunes van marcar l'anovada nueva identidá corporativa de TPA.

Un trabayu nel que'l departamentu de grafismu punxo enfotu y talentu, con técniques d'animación como les que llogren efectos tridimensionales dende la fotografía. Los resultaos déxennos saludar a María Teresa Gallego, retratada por Fernández Balbuena o dir d'antroxu a Uviéu con Evaristo Valle.

Amás les pieces lleven la música de Skygaze, compositor xixonés de prestixu internacional. Les sos melodíes potencien esta anovada manera de transitar pela programación de TPA.

Les 13 pieces van dir apaeciendo na so pantaya, pa estremar espacios pero, sobre manera, pa sentir bien de cerca estes maravíes pictóriques y convidar a toos a veles nos Museos d'Asturies.