Tito Bustillo acueye la presentación del llibru 'Nina'

Uviéu y Ribeseya son escenariu de la primer novela de Marisol Pérez

El centru d'arte rupestre de Tito Bustillo, en Ribeseya, onde se desarrolla una parte de la trama del llibru, acoyó esti mediodía la presentación de 'Nina”. Ye la primer novela de la escritora madrileña Marisol Pérez, obra de ficción na qu'aborda los años de la transición española dende la intrahistoria d'unos personaxes que protagonicen una trama con tintes de novela negra y con referencies a la memoria hestórica.

Filóloga profesora xubilada, Pérez, ye autora de 'Dime dónde estás y vamos a buscarte', una crónica sobre los atentaos madrileños del 11M que sufrió en primer persona.

Ensin venceyos familiares cola nuestra rexón más allá de la fascinación que-y apurre, Marisol Pérez, quiso qu'Asturies, en concreto Uviéu y Ribeseya, fueren dos de los tres escenarios nos que se desarrolla 'Nina', la so primera novela, presentada esta mañana nel centru d'arte rupestre Tito Bustillo de la villa ribeseyana.

El llibru, una novela de misteriu y secretos de familia, aborda la transición española d'una manera mui particular.

Parte de la trama de la novela desarróllase en Ribeseya, con especial protagonismu d'un escenariu tan novelescu como la playa de Santa Marina.

Madre d'una de les víctimes de los atentaos del 11M, Marisol aparcó 'Nina' pa escribir 'Dime donde estás y vamos a buscarte', una crónica d'aquellos atentaos que presentó nel so día na Selmana Negra, a onde-y gustaría volver cola so novela.

'Nina' ye tamién un llibru solidariu. El porcentaxe que-y corresponderá a Marisol, la so autora, por cada exemplar vendíu, dirá destináu a l'Asociación pa la Recuperación de la Memoria Histórica. Unu de los asuntos entá ensin iguar nel nuestru país y que se toca nesta novela.​