Un 35% de los mayores de 65 años curien a los sos nietos varios díes per selmana

Güei celébrase'l Día de los Güelos

Dicen que tendríen que ser inmortales. Y yá que fuera asina. Porque quiciabes nun haya naide que te mire igual aseguren María Luisa Villa y Creik Granda, güela y nietu.

Naide que, anque dacuando s'enrollen, cúntente tan bien y en primer persona la hestoria pasada señalen Susana Pérez y Alonso García, güela y nietu.

Naide que te garre firme, con mano un tanto engurriada y, anque nun lo reconoza, consentidora apunten Tensi González y Darío Gutiérrez, güela y nietu.

Unos seres qu'en vacaciones escolares, sobre manera, conviértense en canguros, según Eurostat, que cifra nun 35% los mayores de 65 años que curien a los sos nietos y nietes, polo menos, dellos díes per selmana espliquen Ángela Escaso y Lucía Jauneau, güela y nieta.

Güelos que n'otros países como Suecia cobren un sueldu por esos cuidaos, porque una llei pionera dexa que los padres tresfiéren-yos parte de la so prestación por permisu parental señala Filomena García, güela.

Que peñen canes dalgunes vegaes, que riñen dacuando, qu'afiten que nun hai música como la d'antes cuando escuchen reggaeton o s'escandalicen al ver qu'estrenes vaqueros rotos. Pero que, a pesar de la reuma o la sordera, nunca te fallen. Asina que, si tien al llau una güela o un güelu nun escaeza de felicitalos güei. Porque tien muncha suerte.