Les xornaes del cómic citen n'Avilés a autores d'Europa, Asia y América

El mundu de los superhéroes, de Marvel y DC, volverá a tener un sitiu especial nes xornaes

Les XXIX Xornaes del Cómic d’Avilés xunirán los continentes d’Europa, Asia y América al traviés d’una ventena d’artistes ente los que destaquen Sole Otero, autora del cartelu d’esta edición; Aneke, Carla Berrocal o Sara Soler, amás de figures como l’americanu Joshua Cassara o l’italianu Marco Galli.

El guion y los sos profesionales volverán a tener protagonismu, tanto na vertiente internacional, con Steve T. Seagle o Ram V; como na nacional, con Antonio Altarriba, Carlos Portela o Fernando Llor, esplicaron esti martes en rueda de prensa la conceyala de Cultura, Yolanda Alonso, y los directores de les xornaes, Jorge Iván Argiz y Ángel de la Calle.

Según la organización, nestes tres últimes décades, dende que remató’l sieglu XX, Avilés convirtióse nuna ponte ente cultures d’una de les más influyentes artes contemporánees, como ye’l cómic.