Marat Morik pinta nel barriu de Villafría un mural dedicáu a los madreñeros de Bezanes

Segundu trabayu del artista pa la edición d'esti añu de 'Parees'

El rusu Marat Morik acabó de pintar esta mañana la última paré del festival de muralismu 'Parees', n’Uviéu.

Foi’l segundu trabayu del artista pa la edición d’esti añu porque decidió asumir el mural qu’otru participante declinó facer a última hora. El mural de fechu ta al llau del primeru que pintó Morik, na cai Luis Álvarez Fueyo del barriu de Villafría.

Ta inspiráu nos madreñeros de Bezanes, nel conceyu de Casu, a los que visitó pa que-yos tresmitieren idees coles que representar el tema.

Con esti mural ponse puntu y final a la séptima edición de 'Parees', que volvía esti añu a la programación cultural uvieína.