El Muséu de Belles Artes incorpora una obra de Fortuny, unu de los artistes "más buscaos"

La obra 'María Luisa en el jardín' va ser instalada na sala 6

La incorporación de la obra 'María Luisa en el jardín', una pintura de Mariano Fortuny (1838-1874), autor ausente hasta agora nes colecciones del Muséu de Belles Artes d'Asturies, supón un "arriquecimientu más qu'estraordinariu" al ser unu de los artistes "más buscaos" pa completar el "cada vez más ricu discursu permanente" d'esta pinacoteca, destaca'l so director, Alfonso Palacio.

Artista poliédricu y de gran singularidá, Mariano Fortuny evolucionó dende unos oríxenes modestos hasta algamar niveles realmente sobresalientes nos que la diversificación y el dominiu de distintes técniques –oleu, acuarela, dibuxu y aguafuerte– emponderáronlu y consolidáronlu como unu de los pintores de mayor proyección del so tiempu.

La conseyera de Cultura, Vanesa Gutiérrez, y el director de la pinacoteca asturiana, Alfonso Palacio presentaron esti xueves la obra, que representa a la fía del pintor, María Luisa Fortuny Madrazo, nacida en Roma en 1868, que apaez afatiada con un vistíu blancu y arrodiada d'un paisaxe de flores y vexetación trupa nel que paez mimetizase cuasi como si d'una flor más se tratara.