Candamu va recrear la Revolución de 1934 en San Román

Les xornaes empiecen esta tarde cola presentación del llibru 'Asturias. Octubre 1934'

Too llisto en Candamu pa les xornaes de recreación histórica, que vienen con novedaes. En llugar de la Guerra Civil, van recular hasta la Revolución del 34, de la que se cumplen, el mes que vien, 90 años.

Anguaño, en llugar d'en Grullos la recreación va ser en San Román, a cinco minutos de la capital candamina. Decidieron cambiar d'allugamientu porque, per primer vegada, nun se va recrear la Guerra Civil, sinón la Revolución d'ochobre del 34 y consideren que dellos de los edificios d'esti pueblu son l'escenariu perfectu.

P'aquellos que quieran averase, les xornaes empiecen esta tarde, a les 18:00, cola presentación del llibru 'Asturias. Octubre 1934' de Paco Ignacio Taibo II, y, darréu, yá se van facer les primeres recreaciones.

Les barricaes yá tán puestes en San Román pa que podamos recular 90 años nel tiempu. Esta edición, cunta con más recreadores, 120, y la cronoloxía de les recreaciones va ser a la inversa de los fechos socedíos.