Entrega del títulu de Fíu Predilectu d'Asturies al cardenal Ángel Fernández Artime

Barbón apella al entendimientu frente a "les tentaciones estremistes" y l'enfadu

El presidente del Gobiernu del Principáu, Adrián Barbón, reivindicó esti llunes la importancia de practicar el diálogu y l'entendimientu, porque frenen "les tentaciones estremistes" y sirven como "vacuna escontra l’enfadu".

Asina lo señaló'l xefe del Executivu na entrega del títulu de Fíu Predilectu d'Asturies al cardenal gozoniegu Ángel Fernández Artime, distinción que nun pudo recoyer el pasáu 8 de setiembre por cuenta de compromisos previos, nun actu que se celebró en Lluanco, villa natal del galardonáu, ante la presencia de familiares y amigos y distintes autoridaes, ente elles, l'arzobispu d'Uviéu, Jesús Sanz Montes.

"El consensu fortalez Asturies. A la nuesa tierra, una comunidá pequeña, somorguiada dafechu nun tresformamientu aceleráu siénten-y bien los alcuerdos", apuntó'l presidente asturianu.