Leonor asume'l protagonismu al convocar los Premios Princesa d'Asturies 2025

Serrat torna a los escenarios nel Teatru Campoamor d'Uviéu

Joan Manuel Serrat tornó a los escenarios esti vienres nel Teatru Campoamor d’Uviéu, onde interpretó una de les sos más renomaes canciones dempués de recoyer el premiu Princesa d’Asturies de les Artes, nuna ceremonia na que la princesa Leonor cobró un gran protagonismu.

Un Teatru Campoamor que se punxo de pie pa ovacionar al cantautor que se retiró de los escenarios a finales de 2022 y qu’interpretó acompañáu d’un vigulín la so emotiva ‘Aquellas pequeñas cosas'.

"Un señor mayor tirando a vieyu", como se definió nel so discursu, qu’acompañó a xeneraciones d’españoles coles sos canciones, y que dixo nun sentise contentu con un mundu “onde too tien un preciu“

Los versos de Serrat tuvieron presentes tamién nel discursu de la princesa d’Asturies, qu’asumió per primer vegada la reseña de los galardonaos colos premios que lleven el so nome, una xera qu’en más de cuatro décades llevó alantre so padre, el rei Felipe VI.

"Emoción -de rei y de padre- que Leonor, como presidenta d’honor que ye de la fundación, s’encargue de facelo dende agora", aseguró’l monarca, que destacó’l privilexu y l’honor y el deprendizaxe que supunxo la responsabilidá d’emponderar a los galardonaos nesta ceremonia.

Tamién asumió esti vienres per primera vegada doña Leonor la clausura del actu y la convocatoria de los Premios Princesa d’Asturies del añu viniente, frase cola que se zarra la ceremonia cada edición y qu’hasta agora pronunció siempres el rei.

Al entamu del so discursu, la princesa recordó un versu qu’escribió Joan Manuel Serrat va 60 años. Ta na canción 'Els veremadors', y acabó les sos palabres con otra de les más recordaes frases del cantautor: "pelea polo que quies y nun desesperes si daqué nun va bien. Güei pue ser un gran día y mañana tamién".

Amás de Serrat, Carolina Marín, Premiu Princesa d’Asturies de los Deportes, campeona olímpica en Río 2016, medaya d’oru en tres mundiales y en siete europeos, foi una de les premiaes más aplaudíes.

Y tamién Cristina de Middle, presidenta de Magnum Photos, y los sos compañeros y antecesores al frente de l’axencia Thomas Dworzak y Olivia Arthur, que, tres recoyer el premiu de manes de la princesa, "desenfundaron" les cámares fotográfiques que llevaben y entamaron a facer semeyes del momentu enriba l’escenariu.

Emotivu foi tamién el discursu de la poeta y activista rumana Ana Blandiana: "¿pue la poesía salvar el mundu?", entrugó enantes de recordar cómo los versos fueron una forma de resistencia nes cárceles de la dictadura comunista del so país: "un arma de defensa escontra la llocura".

Tamién la historietista, cineasta y pintora francoiranín Marjane Satrapi, Premiu Princesa d’Asturies de Comunicación y Humanidaes, que de mano nun diba dir por circunstancies personales graves pero que, a la fin, fizo un esfuerzu por dir a Uviéu, faló nel so discursu del humanismu.

Y de finu humor foi la intervención del escritor, académicu y ex-políticu canadiense Michael Ignatieff, que diferencia los caracteres de les persones que puen ser raposos o puercospinos: "soi un raposu que siempres quixo ser puercospín", dixo, pa rematar el so discursu agradeciendo a la princesa que fizo mui feliz "a un vieyu raposu".

A la ceremonia, na que la reina Sofía recibió tamién una gran ovación, foi tamién ente’l públicu la madre de la reina Letizia, l’asturiana Paloma Rocasolano.

Ente les personalidaes que fueron a esta ceremonia, taben amás los presidentes del Congresu y del Senáu, Francina Armengol y Pedro Rollán, respectivamente; la ministra vocera del Gobiernu, Pilar Alegría; el de Cultura, Ernest Urtasun; la de Ciencia, Anovación y Universidaes, Diana Morant; o del presidente del Tribunal Constitucional, Cándido Conde-Pumpido.

Tamién, el líder de la oposición, Alberto Núñez Feijoo; el presidente catalán, Salvador Illa; el d’Andalucía, Juan Manuel Moreno Bonilla, ente otros.